Luk 5 | MHL | STEP | Iir oko-pa Yeesus Genesaret eka saawirinowa saa pona-pa iimarep ikaeya emeria mua unowa o wiar ekapemi wiam mika-fifien-iwamik, Mua Maneka opora wiar miimu naep.

Luke 5

Yeesus-ke maeya Pita mera unow akena aawok

(Matiu 4.18-22, Mak 1.16-20)

1 Iir oko-pa Yeesus Genesaret eka saawirinowa saa pona-pa iimarep ikaeya emeria mua unowa o wiar ekapemi wiam mika-fifien-iwamik, Mua Maneka opora wiar miimu naep. 2 Aasa erup saa pona-pa ookowap-puiwkin ikaeya urufak. Mera aawow mua-ke aasa purupep orop mera sia yasuwam-ikemik. 3 Ne Yeesus orop Saimon aasa wiar irap ona maakeya aasa suuweya lawisiw ekak. Naeya aasa-pa pokap ikok emeria mua opora wia maakem-ikua. 4 Opora wia maakep-puap naap ikok Saimon maakek, “Aasa suuwap gone ekap sia wafureka.” 5 Naeya maek, “I uura pun senam akena uufunemik nain mera kuisow-ko me aawemik. Ne aakisa nos-ke maeya eliw sia kiiriw wafurinen.” 6 Wi nainiw wafurap mera unow akena aawiwkin mera sia nain puekam naep onak. Ne sia wafurimik nain mua papako aasa oko-pa ikaiwkin wia faremik, ekapep yia asipuk naep. Ne ekap aasa ere-erup mera ipariwkin ipariwkin aasa bulunarekam naep onak. 8 Naeya Saimon-ke naap urufap Yeesus miir onoma-pa keema muuna mikap maek, “Maneka, yo pina mua-ke, yo efamiya me ike.” 9 Moram mera unow akena aawemik nain urufap wi unowiya kema tootonemik. 10 Sebedi muuka erup, Yems Yon ikos Saimon uuwow epaskun-ke, wis pun kema tootonemik. Ne Yeesus-ke Saimon maakek, “No kema me tootone, ikoka emeria mua sira feenap wia aawinan.” 11 Naap wia maakeya aasa pona purupep maa unowa nan piipuap o ookamik.

Yeesus mua mia gigir maneka wiar ikua nain saliwak

(Matiu 8.1-4, Mak 1.40-45)

12 Aria Yeesus owow oko-pa ikaeya mua oko mia gigir mane-maneka onaiya ikua nain o urufap ekap miir onoma-pa keema muuna mikap omawami maakek, “Maneka, nena kookalep-na eliw efa saliweya mia eliwa arinen.” 13 Naap maakeya wapena tiinep o tiimami maakek, “Eliw, no sariare!” Naap maem-ikaeya napuma nain ewursow wiar weeserek. 14 Ne mua nain opor kekanowa maakek, “No mua oko me wia maake, weetak. Wi pris wiar ikiweya mia nefar pupuk. Ne Moses sira wuak nain wiar ookami Mua Maneka patireya nefa mauk, ‘O sariarek.’ Naap nefa mauk.” 15 Ne wia, Yeesus maa muutitik onak nain meta manekarek. Naapeya mua unow akena opora wiar miimowa ekapemik, ne napum mua pun napuma yia iirarominok naep ekapemik. 16 Naeya o anane waisow muuta epa mua marew neeke ikiwep Mua Maneka farem-ikua.

Yeesus mua oko aka umok nain saliwak

(Matiu 9.1-8, Mak 2.1-12)

17 Iir oko-pa Mua Maneka opora nain wia maakem-ikua. Ne wi Farisi ne sira amis mua pun nan ikok opora wiar miimam-ikemik. Emeria mua unowa nain wi Galili, Yuudia ne Yerusalem kame-pa ekapep nan takunep ikemik. Mua Maneka kekanowa o wiar ikaeya mua napuma wia saliwam-ikua. 18 Ne mua papako-ke mua napuma oko ika-pa wuap akuawep pekapemik. Mua nain wapena kepura iiwawun wiar uumarek. Wi koor kemena pikiwep Yeesus mamaiya-pa wuau naep onamik-na me pepek. 19 Emeria mua kerew akeniya koor kemena nain epa iiwawun siinarek. Mua napuma nain kemena pikiwowa me pepek. Naapeya koor iinan purupemik. Wi urupep nomokowa maa muutitik iirarep wuara-pa mua napuma ika nain ifariw kaikap lawisiw akena piipuiwkin Yeesus miir onoma-pa wiar orok. 20 Ne Yeesus yo kekanowa efar kema suuwimik naep mua nain maakek, “Emar, no pina iiwawun nefar weeserek.” 21 Naap maeya wi sira amis mua ne wi Farisi-ke wi-wieniw aakunemi maemik, “Mua fain, mua kamenapeya Mua Maneka firekami opora naap maiya ya? Mua kuisow pina-ko me yia iiraromiya, Mua Maneka waisow makena, pina eliw yia iirarominon.” 22 Wi naap maemik nain Yeesus kema iiriw wiar amisarep opora feenap wia kiripomak, “Ni moram yo opora maem nain kema unu-unowa wuiman? Opora erup fain, ‘No pina iiwawun nefar iirarem,’ e ‘No iikirap soomare.’ Opora erup fain opora kain maemkun makena urufowen? 24 Yo Mua Muuka miiwa-pa fan ikem nain pina eliw nia iirarominen. Nain ni amisareka naep feenap oniyem.” Naap maemi mua napuma nain maakek, “Yo nefa maakiyem, no iikirap inow maa aawep koora ikiwe.” 25 Ne wi unowa nain urufam-ikaiwkin o iikirap ona inow maa nain opap ikiwok. Mua Maneka unuma fakerami ona koora ikiwok. 26 Wi unowa naap urufap soranep eneka teekami Mua Maneka unuma fakerami maemik, “I aakisa kuisow sira onaiya urufamik.”

Yeesus Liwai farek

(Matiu 9.9-13, Mak 2.13-17)

27 Naap ikok Yeesus ikiwem-ikok takis aawow mua-ko urufak. Mua nain unuma Liwai. O takis aawow koora-pa pokap ikua. Urufap maakek, “Yo yooke.” 28 Maakeya iikirami maa unowa nan piipuap ookak. 29 Wi Liwai koora wiar ikiwemik. Nan Yeesus enow maneka onomak. Ne takis aawow mua unowa, ne mua papako pun wi wiamiya maa enemik. 30 Maa enem-ikaiwkin wi Farisi ne wi sira amis mua-ke Yeesus teeria wia amukaremi maemik, “Ni moram wi takis aawow mua ne pina mua nain wiamiya maa enimiman?” 31 Naeya Yeesus-ke wia maakek, “Wi mua napum marewa nain ikemika kaikow mua me wiar ikiwimik, weetak. Wi napum mua muutiw ikiwimik. 32 Yo me wi mua eliwa nain aawowa ekapem, weetak, wi pina mua wia aawowa ekapem.”

Maa enowa emi wuowa sira

(Matiu 9.14-17, Mak 2.18-22)

33 Naeya wis-ke Yeesus maakemik, “Wi Yon teeria-ke fofa pepekimep maa enowa emi wuami Mua Maneka farimik. Wi Farisi teeria pun naap onimik. Ne no teeria-ke weetak, wi maa enowa emi-ko me wuimik.” 34 Naap maiwkin anian wia kaisomami maek, “Mua-ko emeria aawep enuma ikaeya ona womar ekapimik nain wameiya ikok maa enowa emi wuikuan-i? Weetak. 35 Wiimar mua nain umeya iir nain makena, maa enowa emi wuikuan.

36 Mua-ko mia suuwow enuma katiwa puukap mia suuwowa awonarep perenek nain neeke wuap me wariya, weetak. Naap oninon-na mia suuwowa enuma nain samorinon, ne pun konim katiwa enuma nain mia suuwowa awona-pa wuowa me anirinon. 37 Ne oko feenap, wain enuma meme kanima reenep kekaniya neeke me ototimik, weetak. Naap onikuan-na, wain enuma awowa-ke arimep mika-suuweya meme kanima nain pukinon, ne wain fuinon. Ne meme kanima nain pun samorarinon. 38 Naapeya wain enuma meme kanima enuma-pa ototimik. 39 Ne wi wain awona enimimik nain, enuma akimowa miatinimik. Naap maimik, ‘Awona eliwa-ke.’”